Pita Amassada a Periguers

Pitit eveniment dins lo monde occitan perigòrd : lo 24 de novembre se tenguet a Perigüers una « pita amassada »jos la presidencia de David Grosclaude, vice president de la region aquitania, en charja de las lengas  occitana e basca, plan conegut dau monde occitan per aver creat lo jornau la Setmana, sol setmanadier occitan [...]

Pitit eveniment dins lo monde occitan perigòrd : lo 24 de novembre se tenguet a Perigüers una « pita amassada »jos la presidencia de David Grosclaude, vice president de la region aquitania, en charja de las lengas  occitana e basca, plan conegut dau monde occitan per aver creat lo jornau la Setmana, sol setmanadier occitan e èsser estat president nacionau de l’ Institut d’ Estudis Occitans . L’amassada , la granda, se deviá tener a la debuta de decembre, a Bordeu, bien segur. Per los que zo saurián pas, l’ Amassada es un genre de parlament occitan, creat en 2005 a la damanda dau Comitat Economic e Sociau d’ Aquitania e solidament jostengut per lo president Rosseu. La tòca de quela amassada es de botar en òbra las orientacions chausidas per l’espandiment de la lenga dins los domanis  de la cultura (creacion e difusion), de la  pedagogia, daus medias, de la vita publica.

Quela fòrça novela, jostenguda tanben par los despartaments aquitans, a fait esnançar los afars dins qua’iment tots los domanis, e fait prener consciéncia de la plaça que deu tornar prener la lenga occitana dins la societat.La rencontra de Perigüers a permetut de far davant ensenhaires, artistas, personau de l’ Agéncia Culturala, elegits, militants, un bilanç pus leu positiu de las accions menadas dins lo despartament dempuei quilhs cinc ans. Un sol punt negre : l’ensenhament, solidament barrolhat per una educacion nacionala, perfechament representada jurcinc’aurà per un rector rigide e jacobin. Ocasion tanben de presentar au public los resultats de l’enquesta socio-linguistica que bòta la Dordonha au prumier rang per çò quo es dau nombre de locutors (15%) e subretot per la simpatia devers l’ensenhament e la preséncia de la lenga dins la vita publica (cf peça juncha) .

A Bordeu, quauques jorns pus tard se teniá donc la granda Amassada en preséncia dau President Rosseu que a confirmat la determinacion de la region a  endralhar un noveu plan de tres ans (en 2014, quo es un pauc l’inconegut…) e una fòrta colaboracion coma las autras regions occitanas mai que mai per la creacion d’una web TV occitana . Lo noveu rector, absent, a fait saber dins una videò, sa volontat de jostener l’ensenhament mielhs que ne zo faguet son predecessor (zo disset pas entau, mas tot lo monde a comprès…). Chasque despartament faguet lo punt sus sa politica, los moians botats a disposicion de la cultura e de la lenga occitana. La Dordonha es pas mau plaçada, mas lonh dernier los Pireneus Atlantics que consacran ujan 1 million d’ euros a la lenga occitana e autretant per la lenga basca… Quante vau ne’n parlar au President…

L’Amassada es tradicionalament seguida de la remesa dau premi Jaufre Rudel que corona chasca annada un roman, de las novelas o de la poesia en lenga occitana. Ujan, quo es  un recuelh de poesias lemosinas que fuguet recompensat. Joan Peire Lacomba es  agricultor, meitat lemosin, meitat auvernhat. « dins Lo Dever del Vaure (Le Devoir de l’Abime), som convidats a las sasons d’una natura vesitada per lo mite ; la luna i es segur vierja de pas d’òme, mas las vachas (que lo fagueren viure) l’i paissen maitot los pasturaus dau ciau, a la broa de la Via Lachada o Chamin de Sent Jaume. » (J. Dau Melhau)

Me boteri de pensar
Que si chalia tornar naisser
Tant valia quitament
Tornar naisser poeta
O elefant
O quauque ròc vielh jos las estialas
Onte vendrian
Per quauques plan-ponhs de segles mai
S’esniurar de fadas vielhas
E jumir lo vent
Sus la paubra vita daus òmes.

Source : http://www.nama24.com/jeanganiayre/?p=3442...